വേനൽചൂടിനെ ഇഷ്ടപ്പെട്ടിരുന്ന ഒരു കാലം ഉണ്ടായിരുന്നു. ഓരോ വർഷവും ചൂട് കൂടുന്നതിനോടൊപ്പം ഇഷ്ടവും കുറഞ്ഞ് വരുന്നു. ആയിരുന്നാലും ഇതേ സമയത്തുള്ള കുഞ്ഞുങ്ങളുടെ കളിയും സന്തോഷവും, ഒത്തുകൂടലുകളും എല്ലാം കാണുന്നത് ഒരു ആശ്വാസം ആണ്. അതേപോലെ തന്നെ വളരെ കുറച്ച് നേരത്തേക്ക് പെയ്തിറങ്ങുന്ന ആ മഴയും ❤️
കഴിഞ്ഞയിടെ പെയ്ത മഴയിൽ ഒരു കാര്യം കണ്ടു. മഴ ആസ്വദിക്കുന്ന കൂട്ടത്തിൽ പുതിയതായി പൂത്ത പൂക്കളെ കണ്ട് രസിക്കുകയായിരുന്നു. അടുത്ത് ചെന്നപ്പോഴാണ് അതിലും നല്ല രസമുള്ളൊരു കാഴ്ച കണ്ടത്. എന്റെ മനസ്സിൽ മാത്രമായി പതിഞ്ഞിരിക്കേണ്ട കാഴ്ച അല്ലതെന്ന് തോന്നിയ അപ്പോ തന്നെ ഓടിപ്പോയി phone എടുത്തു, ചിത്രം പകർത്തി.
ഒരു കൂട്ടം ഉറുമ്പുകൾ ഒരു കുടക്കീഴിൽ എന്ന പോലെ ഓരോ പൂവിന്റെയും ഉൾഭാഗത്ത് ❤️
കൂട്ടം കൂട്ടമായി വന്ന്, രണ്ടു പേരായി തരം തിരിഞ്ഞ്, ഓരോ പൂവിന്റേയും ഉള്ളിൽ മഴ കൊള്ളാതെ ഒതുങ്ങി ഇരിക്കുന്നു ❤️
പണ്ട് സ്കൂൾ വിട്ടു വരുമ്പോൾ മഴ പെയ്യുന്ന സമയം കുട നിവർത്തി പിടിച്ച്, ചരിച്ച് വെച്ച് മഴ കൊള്ളുന്ന പരുപാടി ഉണ്ടായിരുന്നു ❤️❤️❤️❤️ വീട്ടിൽ ചെല്ലുമ്പോൾ വഴക്ക് കേൾക്കരുതല്ലോ 🙈 എന്നാൽ മിന്നലുള്ള സമയത്ത് ഏതെങ്കിലും വീട്ടിലോ കടയിലോ കയറി നിൽക്കുന്നതായിരുന്നു ശീലം. മിന്നലിനെ പേടിയാണ്. അങ്ങനെ ഒരുപാട് ഒരുപാട് ഓർമ്മകൾ ആ ഉറുമ്പുകൾ എനിക്ക് കാണിച്ച് തന്നു.
കുട ഇല്ലാത്ത നേരം മഴ പെയ്താൽ ഓടിച്ചെന്ന് ഒരു കൂര തേടുന്ന നമ്മെ പോലെ തന്നെ അവരും. വ്യത്യാസം എന്തെന്നാൽ ഉള്ള സ്ഥലം പങ്ക് വയ്ക്കാൻ നമ്മൾ തയ്യാറാവില്ലായിരിക്കും, അവർ പങ്കിടും. സ്ഥലം പോരെന്ന് തോന്നിയാൽ മറ്റൊരു ഇതളിലേയ്ക്കോ പൂവിലെയ്ക്കോ മാറും. പക്ഷേ ഒറ്റയ്ക്കല്ല, കൂട്ടിനുണ്ടായിരുന്ന ആളെയും കൊണ്ട് തന്നെ ❤️
എങ്ങനെ ജീവിക്കണം എന്ന് നന്നായി അറിയാവുന്ന ഇവരെയാണല്ലോ മനുഷ്യൻ മൃഗീയം എന്ന് വിശേഷിപ്പിക്കുന്നത് എന്നോർക്കുമ്പോൾ സങ്കടം തോന്നുന്നു.